Inscunter da la suprastanza SRG.R cun il directur general SRG SSR e la direcziun RTR

La suprastanza da la SRG.R, il directur da la SRG SSR Roger de Weck e la direcziun da RTR s'han radunads venderdi ils 2 da december 2016 a Vella. Per la seduta han els survegnì il dretg d'ospitalitad en la chasa communala a Vella, il lieu da lavur dal vicepresident da la SRG.R e president communal da Lumnezia, Duri Blumenthal.

Il directur general da la SRG SSR, Roger de Weck, ha dà ina survista sur da la situaziun actuala da l’interpresa. El ha era dà ina prospectiva co el vesa la surdada da ses post al nov directur general da la SRG SSR davent da l’october 2017, Gilles Marchand.

La SRG.R ha decidì sur dal nov reglament d’organisaziun da la suprastanza, ed ha approvà il reglament d’indemnisaziuns surlavurà. La direcziun da RTR ha preschentà projects e temas prevesids per il 2017 e dà ina survista dals accents publicistics.

Il president Oscar Knapp ha onurà il vicepresident, Duri Blumenthal, che sorta da la suprastanza SRG.R suenter 12 onns, la durada maximala en uffizi. Era da Michael Spescha, president dal cussegl dal public enfin la fin da l’onn, ha il president tut cumià. Michael Spescha resta activ per la SRG.R sco nov commember dal cussegl regiunal a partir dal 2017. Il president Oscar Knapp ha engrazià cordialmain a Duri Blumenthal e Michael Spescha per lur engaschi durant tants onns, ed ha surdà ina reconuschientscha per lur lavur.

Da sanestra: Michael Spescha, Oscar Knapp, Duri Blumenthal.

L’inscunter da la suprastanza SRG.R cul directur general da la SRG SSR e la direcziun da RTR da la fin da l’onn ha la finamira da dar ina survista sin quai che spetga las interpresas l’onn suandant. Ils participants preschentan ils accents prevesids da lur repart, e profitan da la pussaivladad d’in barat general.