Maletgs da tuts per tuts: RTR e la plattafurma nossaistorgia.ch

La finamira da questa plattafurma è da crear ina cuminanza d'utilisaders che documentescha e reconstruescha muments istorics da la Svizra rumantscha e dal Grischun. Ils utilisaders da «nossaistorgia.ch» sa registreschan sin la plattafurma e deponan fotografias, films, videos, registraziuns da tun digitalisadas e testimonianzas en scrit ubain autras funtaunas actualas ed istoricas. Els publitgeschan lur documents sin la plattafurma ed als partan cun la communitad. In e scadin po crear gratuitamain in account e contribuir al success dal project: cun interagir e cun commentar documents, cun publitgar agens documents e cun crear dossiers.

Istorgia da success dapi 2009
La plattafurma «nossaistorgia.ch» è vegnida sviluppada a basa d’in project da Radiotélévision Suisse (RTS) e da la Fundaziun per il mantegniment dal patrimoni audiovisual da RTS (FONSART) che ha lantschà l’onn 2009 en Svizra franzosa la plattafurma notreHistoire.ch. Sin fundament dal success en quella regiun ha la SRG SSR decidì da sustegnair la realisaziun da talas plattafurmas era en las autras regiuns linguisticas da noss pajais. Da quella offerta han fatg diever RSI en Svizra taliana ed RTR en Svizra rumantscha.

Ladina Heimgartner, directura RTR, sa legra che la plattafurma stat era a disposiziun en ina versiun rumantscha: «Cun sustegn da nossa chasa-mamma, la SRG SSR, avain nus pudì realisar quest project che pussibilitescha ad RTR da render accessibel a la publicitad anc meglier ses archiv audiovisual. Da cuminanza cun noss public vulain nus scriver l’istorgia da nossa regiun.»

La plattafurma «nossaistorgia.ch» è averta a privats, instituziuns, scolas e medias. Ils utilisaders han la pussaivladad da deponer fotografias, films, videos, registraziuns da tun e documents actuals u istorics da noss chantun. Uschia èsi pussaivel da colliar funtaunas, d’approfundar temas da l’istorgia da la Svizra rumantscha e dal Grischun.

Dapli infurmaziuns
Radiotelevisiun Svizra Rumantscha, Via da Masans 2, 7000 Cuira
Tamara Deflorin, scheffa communicaziun, tel. 081 255 75 09, tamara.deflorin@rtr.ch