Premi SRG.R 2019 a la scola primara da Donat

Cun chanzuns dal cumponist indigen Tumasch Dolf han las scolaras ed ils scolars da Donat engrazià a la SRG.R per quest premi ch'è dotà cun 8'000 francs. Sco suletta scola sutsilvana ha la scola da Donat adina puspè da cumbatter per meds d'instrucziun actuals e moderns. Per il pli translateschan las scolastas ed ils scolasts sezs il material d'instrucziun e quai è cumbinà cun grond engaschament e blera lavur supplementara.

Laudatio da Hansjörg Hassler

Questa lavur saja vegnida renconuschida bler memia pauc, er en la regiun ha ditg Hansjörg Hassler, l'anteriur cusseglier naziunal che ha fatg la laudatio. I na saja betg simpel per la vischnanca d'engaschar scolastas e scolasts ch'èn pronts da prestar questa lavur supplementara. Hansjörg Hassler ha er declerà co la situaziun dal rumantsch sutsilvan è il mument. I na vesia betg or uschè bain. I dettia radund 1000 persunas che discurrian sutsilvan. Ozendi datti mo anc ina scola rumantscha en la Val Schons. Enturn ils 1870 aveva quasi mintga vitg ina scola. En tut devi lura 10 scolas sutsilvanas. 50 onns pli tard, enturn ils 1920 na vegnivi betg instruì rumantsch pli en la val Schons. Ins vegniva schizunt chastià sch'ins discurriva rumantsch sin plaz scola. Pli tard han las vischnancas introducì il sursilvan en scola e pir il 1940 è il sutsilvan daventà linguatg da scrittira en la val Schons. Oz datti ina scola primara rumantscha a Donat, ina scola primara tudestga ad Andeer, ina scola superiura a Ziràn, ina scoletta rumantscha a Ziràn ed ina scoletta tudestga ad Andeer. Ils uffants da l'entira vallada pon tscherner schebain els vulan visitar la scola rumantscha a Donat u la scola tudestga ad Andeer.