Bild von La SRG SSR en il dialog cun la populaziun
Public value al Forum Lucerna
SRG SSR Svizra Rumantscha News

La SRG SSR en il dialog cun la populaziun

La SSR è enragischada fermamain en la societad svizra ed è sco uniun averta per in e scadin. Tant pli impurtant èsi per la SSR sco chasa da medias publica da chapir co che la populaziun percepescha sia incumbensa da service public. Surpassa la contribuziun sociala da la SSR sia purschida da prestaziuns? E co sa differenziescha ella sco interpresa da service public dad autras medias?

En il rom da las refurmas annunziadas il 2018 ha la SSR inizià in barat cun il project «Public Value». Enfin la stad 2019 èn vegnids eruids temas prioritars per l'interpresa a maun da discurs sistematics, lavuratoris e d'ina retschertga. Ils passa 5000 resuns mussan co che la populaziun percepescha la SSR e tge ch'ella spetga dad ella.

Quests resuns èn vegnids evaluads en in rapport e cumprimids a set tematicas principalas.

La SSR approfundescha sias enconuschientschas d'enfin ussa

Las set tematicas principalas approfundescha l'uniun purtadra da la SSR ils proxims mais ensemen cun la populaziun. Per pudair far quai envidan las quatters societads regiunalas e pliras societads commembras tut las persunas interessadas da tut las vegliadetgnas ad occurrenzas publicas che han lieu en l'entira Svizra. Approfundai sco participant(a) dals lavuratoris ils set temas, sviluppai novas ideas e priorisai quellas.

«Dialog en las regiuns»

sonda, ils 21 da mars a chaschun da la radunanza generala da la GIURU a Savognin
SPUSTÀ - ANC BETG DEFINÌ NOVA DATA

mardi, ils 21 d'avrigl en sala Walpen, chasa RTR Cuira
SPUSTÀ - ANC BETG DEFINÌ NOVA DATA

Tgi po e duai sa participar a las occurrenzas e contribuir al tema?

Vus! Las occurrenzas èn avertas ad in vast public. La SSR vul che uschè bleras persunas differentas sco pussaivel fetschian part dals inscunters, s'exprimian e participeschian a la discussiun. La SSR nizzegia quest dialog per pudair integrar en sias refurmas las spetgas da la societad envers il service public medial.

Avais Vus interess? Nizzegiai las suandantas pussaivladads per exprimer Vossa opiniun:

Prendai part ad in'occurrenza publica en Vossa regiun. Tranter il schaner ed il matg 2020 avais Vus la pussaivladad da participar ad in dals 28 lavuratoris. Las infurmaziuns davart las occurrenzas chattais Vus sin las paginas-web da las societads regiunalas:

SRG Deutschschweiz

SRG SSR Svizra Rumantscha

RTSR (Svizra franzosa)

CORSI (Svizra taliana)

N'avais Vus nagina peda da participar persunalmain ad in'occurrenza? Lura empleni la retschertga online naziunala. Quella As permetta da dar Voss parairi da tut temp en ina furma cumpacta. La retschertga cumenza qua .

Rumantsch: https://www.surveygizmo.com/s3/5327944/d17eda621662

Deutsch: https://www.surveygizmo.com/s3/5327944/348c2a00fdb5

Français: https://www.surveygizmo.com/s3/5327944/2dadb74b0a42

Italiano: https://www.surveygizmo.com/s3/5327944/b6ee314ae534

Tge capita cun ils resultats?

Ils impuls, las propostas da soluziun ed ils puncts da critica che vegnan rimnads a las occurrenzas da l'uniun purtadra vegnan integrads enfin il zercladur 2020 en in rapport final naziunal. L'interpresa vegn ad evaluar las differenzas tranter las percepziuns externas ed internas sco era las ideas ed ils impuls concrets da vart da la populaziun. Silsuenter vegn ella ad eruir las pussaivladads da svilup per l'interpresa. Las mesiras pon per exempel vegnir realisadas en il program, en ils chanals da vendita u en auters secturs da l'interpresa e da l'uniun purtadra. Il dialog cun la societad civila fa part da la concessiun da la SSR. Perquai vul la SSR repeter regularmain quest project.

Teilen Sie uns Ihre Meinung mit (bitte beachten Sie die Netiquette/AGBs)

Lade Kommentare...

Deactivà funcziun da commentari

Nus vulain examinar e publitgar Voss commentaris svelt. Perquai n’èsi betg pli pussaivel da commentar artitgels pli vegls.