SRG SSR Svizra Rumantscha In eigener Sache News

Reelecziuns ed elecziuns en ils gremis

Leta à Porta è creschida si a Guarda ed abitescha a Scuol. La dunna da 53 onns è commerzianta tar la Gammeter Media SA a Scuol e remplazza Elvira Pünchera da S-chanf che ha abditgà per la fin da l'onn. Leta à Porta era enfin uss commembra dal Cussegl regiunal da la SRG.R. Ella entra en uffizi l'emprim da schaner 2025. Ils ulteriurs commembers da la suprastanza cun il president Vincent Augustin, la vicepresidenta Elena Luzio, Gion Lechmann e Roger Tuor èn vegnids reelegids unanimamain.

Sco successura da Leta à Porta en il Cussegl regiunal è vegnida elegida Uorschla Rauch da Scuol. Ella è magistra primara ed è creschida si a Sta. Maria en Val Müstair. Ultra da quai remplazza David Spinnler da Sta. Maria la Schlarignotta Romana Ganzoni che ha cuntanschì la limita dal temp d'uffizi. David Spinnler è manader da la Biosfera Val Müstair. Per Patrick Schaniel che sto medemamain bandunar il gremi causa limita dal temp d'uffizi vegn Cornelia Cathomas-Maissen da Surrein. Ella è mamma e chasarina. A Nora Baltermia che ha abditgà succeda l'emploiada mercantila Sandra Baltermia da Salouf.

Las ulteriuras commembras ed ils ulteriurs commembers dal Cussegl regiunal èn vegnids reelegids. Tut las elecziuns èn succedidas unanimamain.

Er las commembras ed ils commembers dal Cussegl dal public èn vegnids reelegids unanimamain.

Cordiala gratulaziun a tut ils nov- ed a tut ils reelegids.

La suprastanza cun la commembra partenta Elvira Pünchera

Durant la radunanza è er vegnì surdà il premi SRG.R 2024. Il chor da scolaras e scolars "Las Filomelas" ed il musicist Simon Gabriel han gì grond plaschair da pudair prender encunter quest premi. Cun duas chanzuns, respectivamain in toc musica, han els emballì la radunanza. Il scrivent e filosof Göri Klainguti ha fatg la laudatio. El ha punctuà l'impurtanza da la cultura e pretendì cun in tschegn d'egl, che la giuventetgna n'haja betg temp pli per far musica. Els hajan autras prioritads. I saja dentant bel che "Las Filomelas" e Simon Gabriel mussian gist il cuntrari da questa pretensiun.

Il premi SRG.R è dotà cun 8000.-. Las Filomelas survegnan 5000.- e Simon Gabriel 3000.-

Ina part dal chor da scolaras e scolars "Las Filomelas"  cun Simon Gabriel ed il president Vincent Augustin

Ina part dal chor da scolaras e scolars "Las Filomelas" cun Simon Gabriel (davos, il terz da sanester) ed il president da la SRG.R, Vincent Augustin (davos, il 5. da sanester)

Gilles Marchand, il directur general da la SRG SSR è stà per la davosa giada giast en questa funcziun.

Teilen Sie uns Ihre Meinung mit (bitte beachten Sie die Netiquette und Rechtliches)

Lade Kommentare...
Noch keine Kommentare vorhanden

Leider konnte dein Kommentar nicht verarbeitet werden. Bitte versuche es später nochmals.

Ihr Kommentar wurde erfolgreich gespeichert und wird nach der Freigabe durch SRG Deutschschweiz hier veröffentlicht