Radunanza generala 2019

Per Vincent Augustin è quai l'emprima radunanza generala da la SRG.R ch'el maina. L'onn passà è el vegnì elegì sco nov president. Quest onn elegia la radunanza ina nova persuna en suprastanza. La suprastanza propona dunna Ladina Simonelli - Zisler per quest post.
Ils pleds da bainvegni vegnan quest onn dal president da vischnanca da Laax Franz Gschwend e dal schef da la regenza, cusseglier guvernativ Jon Domenic Parolini.

Premi SRG.R 2019 va en la Val Schons
La scola primara da Donat survegn il premi SRG.R en renconuschientscha da sia premura per l'idiom sutsilvan. Sco suletta scola sutsilvana ha la scola da Donat adina puspè da cumbatter per meds d’instrucziun actuals e moderns. Per il pli translateschan las scolastas ed ils scolasts gist sezs il material d’instrucziun, e quai è adina er cumbinà cun engaschament e lavur supplementara. Actualmain dumbra la scola da Donat 29 scolaras e scolars. 10 dad els van en l’emprima classa. Il premi è dotà cun 8'000 francs e vegn surdà durant la radunanza generala.

La radunanza da la SRG.R cumenza a las 10:30 en l'aula da la chasa da scola Grava a Laax.