Radunanza generala ils 21-05-2016 a Cuira

La radunanza generala 2016 da la SRG.R ha lieu sonda, il 21 da matg al Marsöl a Cuira. L'invit detaglià per commembras e commembers segua.

Il program cumenza a las 9:30 cun l'avertura da la sala ed il bainvegni cun café e cornets. La radunanza generala cumenza a las 10:00. In dals puncts impurtants da la radunanza sun las elecziuns dals gremis SRG.R per la perioda d'uffizi 2017-2020. La directura da RTR, Ladina Heimgartner, infurma sur da las fatschentas ed actualitads tar RTR. Il premi SRG.R vain surdà a Clà Riatsch, professer per la lingua e cultura rumantscha. Suenter la radunanza envida la SRG.R a commembras e commembers ad in gentar communabel.

Sco program accumpagnant, en chasa RTR, suondan infurmaziuns sur da la distribuziun da programs RTR: co, nua e cun tge apparats vegn quai fatg. Pli tard datti café e dessert. Tut las commembras ed ils commembers da la SRG.R sun amiaivelmain envidads!