Premi  SRG.R (pli baud premi CRR)

Las emprimas discussiuns
Il zercladur 1954 s'occupa la suprastanza per l'emprima giada da questa fatschenta. Ella discuta davart l'introducziun d'in premi da la CRR. D'in reglament cun criteris per adossar in premi desista la suprastanza. En la practica survegn la remuneraziun u il sustegn per lavurs spezialas dentant gia ils proxims onns il caracter d'ina renconuschientscha per lavur en favur da lingua e cultura rumantscha. Quella renconuschientscha u undrientscha obtegna bainprest senza conclus spezial la furma ed il caracter d'in premi.

Il premi vegn reguardà en ils statuts
A chaschun da la radunanza generala dals 19 d'october 1968 vegnan ils statuts da la CRR dals 28 da favrer 1953 remplazzads tras novs statuts. Quels van en vigur l'entschatta da schaner 1969 e prevesan per l'emprima giada la pussaivladada d'accordar in premi da radio e televisiun. La decisiun stat en la cumpetenza da la suprastanza. Cun chaschun da la revisiun totala dals 7 da zercladur 1980 vegn la formulaziun dals statuts da 1968 recepida en ils novs statuts senza midadas materialas, dentant cun l'agiunta ch'il premi saja mintgamai da surdar a chaschun da la radunanza generala.

Tenor ils statuts dals 9 da matg 1992 concluda il directori eventuals premis da radio e televisiun da la CRR. Il directori n'è consequentamain betg lià vid in ritmus annual.

Survista 1960-2017  Premi CRR SRG R 1960-2017.pdf (139.4 KB) Icon