Late Night Talk a San Murezzan - live cun Vus!

La televisiun svizra da lingua tudestga SRF producescha mintga saira dals 6 enfin e cun ils 18 da favrer 2017 in uschenumnà Late Night Talk sur dal Campiunadi mundial da skis a San Murezzan. Igl è in’emissiun da discurs cun ina legenda da skis - da Bernhard Russi enfin a Franz Klammer, da Marie Theres Nadig enfin a Sonja Nef - e cun in giast prominent interessà al sport – da Christian Stucki enfin a Francine Jordi. Ils temas èn actuals quel di, ma sa dattan era dal curs da la vita da la legenda da skis preschenta. In accordeonist grischun procura per il rom musical da l’emissiun.

Il svilup da l’equipament dad ir cun skis vegn preschentà e tematisà ed in actur scuvra San Murezzan ed il Campiunadi mundial da skis. Ina rubrica empermettenta sa numna “Rumantsch per Unterländlers”: Ina legenda da Samedan instruescha il public a la fin da mintg’emissiun intginas frasas rumantschas nizzaivlas per turists.

L’emissiun vegn registrada mintga saira a las 19.30 en in lieu tut spezial dasper la staziun da San Murezzan. Sur l’emettur va ella ca. a las 22.30 da la medema saira durant ca. 40 minutas. Il lieu dal’ emissiun è unic en l’istorgia da SRF e porscha lieu a 40 - 50 aspectaturs ed aspectaturas. In’occasiun singulara da far part al mund dals gronds skiunzs e da las grondas skiunzas, da televisiun e dal divertiment sportiv en Engiadina!

Vulais era vus esser da la partida? S’annunziai anc oz tar SRF Sport sut http://www.srf.ch/sport/ski-alpin/st-moritz-2017/tickets-fuer-die-ski-wm-talkshow-bei-srf.

Annunzias pon vegnir resguardadas uschia lunsch ch’igl a plaz. N’emblidai betg da prender cun vus vestgadira chauda! En il lieu èsi permanentamain null grads. Gia in’idea tge che quai pudess esser? Engiavinai!

RTR live dal campiunadi mundial da ski alpin 2017
Radio Rumantsch: mintga di, 11:00-12:00 e 15:00-18:00
Televisiun Rumantscha: Telesguard live da San Murezzan: 06-02-2017 e
17-02-2017, 17:40 sin SRF1 unbain sin Play RTR
Al lieu ed online: Ensemen cun SRF3 è RTR preschent amez il vitg da San Murezzan. Faschai era Vus ina visita en noss studio tranter las 08:30-18:00.
E per tut quels che restan a chasa: Sin rtr.ch chattais Vus tut quai che capita durant il campiunadi mundial da ski alpin ed anc bler auter.