Premi schurnalistic 2015

Il Cussegl dal public SRG.R (CDP) ha surdà il Premi schurnalistic SRG.R 2015 ad Astrid Alexandre. Ella è vegnida undrada per la contribuziun «Med Ursina i København» en l'emissiun da profundaziun Marella dal Radio Rumantsch. L'emissiun da var in'ura fa part dal program regular e tracta profundamain in tema.

Astrid_Alexandre.jpgAstrid Alexandre

Il Premi schurnalistic SRG.R onurescha products schurnalistics da la chasa RTR. La giuria, che consista da tschintg commembers dal CDP SRG.R, ha tadlà e guardà las radund 35 contribuziuns inoltradas. Per il Premi schurnalistic SRG.R 2015 ha ella nominà las suandantas emissiuns e contribuziuns:

  • «Med Ursina i København» Astrid Alexandre (radio)

  • «Amur, lavur u aventura» Esther Berther (radio)

  • «IMPORT EXPORT – Ils affars interessants da Mattias Bulfoni»
    Martin Cantieni (televisiun)

  • «Complicato – tanto complicato» Eligi Derungs (televisiun)

  • «In’emna turbulenta a Ftan / Dossier: Institut Otalpin Ftan»
    David Truttmann e ses team (televisiun / online)

Da questas propostas han las commembras ed ils commembers dal CDP SRG.R lura tschernì la victura Astrid Alexandre cun la Marella «Med Ursina i København». Il premi è dotà cun CHF 6’000.00.

«Med Ursina i København»

Astrid Alexandre ha realisà la Marella «Med Ursina i København» ch'è vegnida emessa per l'emprima giada il fanadur 2015. L'emissiun purtretescha Ursina Giger a Copenhagen e transmetta grondiusas impressiuns da questa citad. Astrid Alexandre maina a moda simpatica e suverana tras l'emissiun. Questa Marella fa gust sin dapli e dilucidescha la citad da Copenhagen en tut sias fassettas. Kino per las ureglias en il Radio Rumantsch. Ursina Giger ha tegnì la laudatio cun ina contribuziun da video.

Premi schurnalistic 2014

Il premi schurnalistic è vegnì surdà a Petra Rothmund. Ella è vegnida onurada per il film «Dal Magic Wood al Action Wood». Il premi è dotà cun 6000 francs.

petra Rothmund.jpgMichael Spescha, president cdp, Petra Rothmund e Roman Schmid.

«Dal Magic Wood al Action Wood»
Petra Rothmund ha realisà il film ch’è vegnì emess l’emprima giada il november 2014. Il film mussa bleras fassettas ed ina cuntrada particulara en noss intschess. Ils Cuntrasts conferman ch’ins cuntanscha cun bainvulientscha e toleranza ina schliaziun. Ils maletgs dattan invista en in mund mirveglius strusch scuvrì. Quest lieu magic è dentant enconuschent en la scena da bouldrar lunsch sur ils cunfins svizzers ora.

Il premi schurnalistic
Il premi onurescha products schurnalistics da la chasa RTR. La giuria, che consista da tschintg commembers dal cussegl dal public SRG.R, ha tadlà e guardà tut las 30 contribuziuns inoltradas. Per il premi schurnalistic ha ella nominà las suandantas emissiuns e contribuziuns:
– «Punt Tamina Top (Telesguard)»: Curdin Fliri (televisiun)
– «Candi-Cartoon»: Peter Kreiliger e ses team (online)
– «Viver cun ed il medem mument senza sia dunna»: Violanta Rominger (radio)
– «Dal Magic Wood al Action Wood»: Petra Rothmund (televisiun)
– «Il misteri da Bargun, cronica d’in mazzament da chatscha»: Gieri Venzin (televisiun)

Premi schurnalistic 2013

Il cussegl dal public ha surdà il premi schurnalistic a Livio Foffa e David Spinnler. Els èn vegnids onurads per il project «Allegra Rumantschs» che radio SRF3 ha realisà il zercladur 2013 en collavuraziun cun Radio Rumantsch.

image_span12.jpgLivio Foffa, Michael Spescha, president cdp, e David Spinnler.

Il Premi schurnalistic onurescha products schurnalistics da la chasa RTR. La giuria che consista da tschintg commembers dal cussegl dal public SRG.R ha tadlà e guardà tut las propostas. Inoltradas èn vegnidas bun 30 contribuziuns. La giuria ha fatg ina tscherna e nominà las suandantas tschintg propostas per il premi che vegn surdà en questa furma per l’emprima giada.

«Allegra Rumantschs»
Il zercladur 2013 han radio SRF3 e Radio Rumantsch tschentà la Svizra Rumantscha, la cultura ed il linguatg rumantsch en il center da lur emissiuns. Livio Foffa ha moderà – ensemen cun Mario Torriani da SRF3 – l’emissiun da la damaun, e David Spinnler ha accumpagnà la collega Anic Lautenschlager sin in viadi da Vrin sur Donat, Riom, Segl fin a Sent. En sia laudatio ha Michael Spescha, il president da la giuria, menziunà en spezial la moda e maniera persvadenta, simpatica e cumpetenta, cun la quala ils dus premiads han manà tras ils programs e realisà contribuziuns. Ultra da quai ha era il fatg che la collavuraziun cun SRF3 ha pussibilità a la Svizra Rumantscha da sa preschentar ad in public fitg vast chattà l’accoglientscha da la giuria.